Sirkus Íslands var stofnaður árið 2007 af tíu vinum sem vildu upphefja sirkusmenningu á Íslandi. Forsprakkinn er Lee Nelson, sem er trúður og götulistamaður sem ílentist á Íslandi og á nú fjölskyldu hér. Fyrsta sýningin var sett upp í Hafnafjarðarleikhúsinu og hét Stórasti sirkus Íslands. Næsta sýning var sett upp í Salnum í Kópavori og nefndist Sirkus Sóley árið 2010. Ö-faktor var sett upp í Tjarnarbíói 2012 og var sett upp eins og raunveruleikaþáttur þar sem keppt var í sirkuslistum.  Heima er best var sérstaklega sett saman fyrir sirkustjald á Volcano-sirkuslistahátíð Norræna hússins og eftir það var ekki aftur snúið: Sirkusinn varð að kaupa alvöru sirkustjald. Með hjálp þjóðarinnar á hópfjármögnunarsíðunni Karolina Fund gekk það eftir og árið 2014 var fyrsta íslenska farandsirkussumarið. Í dag starfa um tuttugu manns hjá sirkusnum, ýmist í heilu eða hálfu starfi. Yfir sumartímann ferðast þrjátíu manns með sirkusnum. Þrír stofnmeðlimir nema núna sirkuslistir í Codarts-háskólanum í Rotterdam, en þar að auki styrkir sirkusinn meðlimi til námskeiða erlendis og fær kennara og gestalistamenn til Íslands. Sirkus Íslands æfir í Ármanni og leggur grunn að sirkusframtíðinni með því að starfrækja sirkusskóla fyrir börn. Auk þess að búa til sýningar fyrir börn og fjölskyldur sýnir sirkusinn fullorðinssirkussýningar sem kallast Skinnsemi, þar sem snúið er út úr hefðbundnum sirkus og honum blandað við kabarett, burlesque og fullorðinshúmor.

Netfang: sirkusislands@gmail.com

Tengiliður vegna fjölmiðla og miðasölu: Margrét Erla Maack, s. 6632548

Sirkusstjóri, Lee Nelson: mrsillee@hotmail.com sími 6600740

sirkus islands