BOÐSKAPUR Á HEIMSLEIKHÚSSDEGINUM 2019


Posted on March 27th, by leikhopar1 in Frettir. No Comments

0 Flares Twitter 0 Facebook 0 Filament.io 0 Flares ×

CarlosCeldran_Laura Ramos

Þegar áhugi minn á leikhúsi vaknaði og ég hóf þar störf höfðu lærifeður mínir þá þegar sett mark sitt á það. Þau höfðu byggt heimili sín og skáldlega sýn á því sem þeirra eigin líf hafði skilið eftir. Mörg þeirra eru ekki þekkt eða fólk minnist þeirra sjaldan.  Þau störfuðu í þögn, af auðmýkt og hógværð æfingasala sinna og þéttsetinna leikhúsa og eftir margra ára ótrúlega vinnu og framúrskarandi afrek, yfirgáfu þau smám saman svæðið og létu sig hverfa. Þegar ég skildi að störf mín og persónuleg örlög fólust í því að feta í fótspor þeirra, skildi ég einnig að ég fékk í arf frá þeim þá einstöku arfleifð að lifa í núinu, án nokkurra annarra væntinga en að ná gegnsæi einstaks og óafturkræfs augnabliks, – andartak samveru með öðrum í rökkri leiksalarins og aðeins vernduð af sönnu látbragði, afhjúpandi orði.

Leikhúsheimur minn er búinn til úr augnablikum samveru minnar með áhorfendum sem koma í leikhúsið kvöld eftir kvöld úr ólíkustu afkimum borgarinnar sem ég starfa í til að vera með okkur fáeinar klukkustundir, fáeinar mínútur. Líf mitt grundvallast á þessum sérstæðu mínútum, þegar ég hætti að vera „ég“ og þjást fyrir sjálfan mig, endurfæðist ég og skil hvaða þýðingu leikhússtarfið hefur: Augnablik einskis annars en skammlífs sannleika þegar við vitum að það sem við segjum og gerum í  sviðsljósinu er satt og endurspeglar hið dýpsta og persónulegasta hjá okkur sjálfum. Leikhúsheimur minn, og leikara minna, er heimur ofinn úr augnablikum sem við skiljum eftir á bak við grímuna, mælskuna, óttann við að vera það sem við erum, og við tökumst í hendur í myrkrinu.

Hefðir leikhússins eru láréttar. Enginn getur fullyrt að til sé einhver forréttindastaður í heiminum, í einhverri borg, í einhverri byggingu. Leikhúsið eins og ég fékk það, breiðir úr sér um ósýnilegar lendur, sem renna saman við líf leikhúsfólksins, og þeirra sem standa á sviðinu og einnig þeirra sem sjást ekki, í eina sameiginlega hreyfingu. Allir meistarar leikhússins, konur og karlar, vita að þau deyja ásamt augnablikunum óafturkræfu, tæru og fögru, án þess að  nokkur varðveitti þau og gerði fræg. Augnablik sannleika, tvískinnungs, krafts, frelsis í ógnar óvissu. Ekkert af verkum meistaranna mun lifa af, nema dagsetningar og vitnisburður verka þeirra í vídeóum og ljósmyndum, sem einungis geta miðlað fölri hugmynd um það sem þau skópu. Og það sem alltaf mun skorta í þessar heimildir eru þögul viðbrögð áhorfenda sem skilja samstundis að það sem á sér stað er ómögulegt að yfirfæra og er hvergi að finna utan leikhússins, að sannleikurinn sem þeir hafa upplifað í sameiningu er lífsreynsla í fáeinar sekúndur, jafnvel gegnsærri en lífið sjálft.

Þegar ég uppgötvaði að leikhúsið væri land í sjálfu sér, gríðarstórt meginland sem breiðir úr sér yfir allan heiminn, varð til innra með mér staðföst ákvörðun sem lýsti sér einnig sem frelsi: Þú þarft ekki að fara langt burt, eða flytja þaðan sem þú ert, þú þarft ekki að hlaupa eða hreyfa þig. Áhorfendur eru þar sem þú ert. Þar er samferðafólkið sem þú þarfnast þér við hlið. Þar, fyrir utan heimili þitt, hefurðu ógegnsæjan og óskiljanlegan raunveruleikann. Starf þitt vex úr þessu sem virðist vera kyrrstaða og þú býrð til stærstu ferðalög, endurtekur Ódisseif, ferðir geimfaranna: Þú ert kyrrstæður ferðalangur sem eykur í sífellu hraða, þéttleika og festu á raunverulegum heimi þínum. Ferð þín er í átt að augnablikinu sem aldrei er hægt að endurtaka, að fundi við jafningja þína. Ferð þín er til þeirra, inn í hjarta þeirra, inn í sál þeirra. Þú ferðast innra með þeim, í tilfinningum þeirra og minningum sem þú vekur og hreyfir við. Enginn getur mælt eða þagað yfir svimandi ferðalagi þínu, það er ferð um fantasíu fólksins þíns, fræ, sem sáð er á fjarlægustu svæðum: Hinni pólitísku, siðferðilegu og mannlegu samvisku áhorfenda þinna. Þess vegna hreyfi ég mig ekki og verð um kyrrt heima, hjá mínum nánustu, í kyrrð og ró, að því er virðist, og vinn dag og nótt, vegna þess að ég á leyndarmál hraðans.

Havanna (Kuba) í janúar 2019

Þýðing: Hafliði Arngrímsson

 

Carlos Celdrán

Carlos Celdrán fæddist á Kúbu árið 1963, þar sem hann lifir og starfar sem leikstjóri, skáld og leiklistarkennari. Hann lauk leiklistarnámi árið 1986 og vann síðan sem ráðgjafi og síðar sem leikstjóri í Teatro Buendía í Havanna.  Árið 1996 stofnaði hann leikhópinn Argos Teatro, þar sem hann er til þessa dags listrænn stjórnandi og hefur einbeitt sér að því að kynna fyrir kúbverskum áhorfendum evrópska leikritun bæði sígilda og samtímaleikritun. Með sýningum á leikritum Brechts, Ibsens, Beckets og Strindberg og einnig evrópskum samtímaleikritum hefur Argos leikhúsið blásið nýju lífi í leikritun á Kúbu.  Þetta hefur hleypt leikskáldum þar í landi kapp í kinn enda hefur Argosleikhúsið sýnt fjölda kúbverskra samtímaleikrita eftir leikskáld á borð við Gonzalez Melo og mörg fleiri. Argos leikhúsið er eitt þekktasta leikhús Kúbu, sýning þess „Tíu milljónir“ sem Calderán skrifaði hefur ferðast um heiminn og einnig nýjasta sviðsetningin „Leyndardómar og smá leikrit“ („Misterios y pequeñas piezas“, 2018). Carlos Calderán hefur hlotið margvíslegar viðurkenningar, þar á meðal kúbversku gagnrýnendaverðlaunin sextán sinnum fyrir „bestu sýninguna“. Hann hefur kennt leikstjórn í meir en tuttugu ár við Instituto Superior de Arte de Cuba.





Leave a Reply

Your email address will not be published. Required fields are marked *



Fréttir

Fréttir og tilkynningar úr starfi sjálfstæðra sviðslistahópa. Sendið okkur póst á leikhopar@leikhopar.is

Aðalfundur Bandalags Sjálfstæðra Leikhúsa 2019

Kæru félagar

Aðalfundur SL verður haldinn mánudaginn 27. maí kl. 20 í Tjarnarbíó.

Dagskrá:

1. Skýrsla stjórnar

2. Reikningar bandalagsins

3. Lagabreytingar

4. Kosning stjórnar og formanns (þegar það á við)

5. Ákvörðun...

BOÐSKAPUR Á HEIMSLEIKHÚSSDEGINUM 2019

Þegar áhugi minn á leikhúsi vaknaði og ég hóf þar störf höfðu lærifeður mínir þá þegar sett mark sitt á það. Þau höfðu byggt...

OPIÐ FYRIR UMSÓKNIR LEIKÁRIÐ 19/20
http://new.leikhopar.is/wp-content/uploads/2019/01/43521564_2301874126735433_3792458767720643268_n.mp4 OPIÐ FYRIR UMSÓKNIR LEIKÁRIÐ 19/20 – SAMSTARFSVERKEFNI OG VINNUSTOFUR

Tjarnarbíó kallar eftir umsóknum um samstarfsverkefni á komandi leikári. Öll sviðsverk koma til greina. Þau verk...